أكبر مشكلتين عند المسوقين، وإزاي GA4 بيحلهم مع بعض

أكبر مشكلتين عند المسوقين دلوقتي: داتا الإعلانات متفرقة في كل منصة، ومحدش عارف البيعة جت منين فعلًا. GA4 بيحل الاتنين مع بعض. بيجيب صرف Meta وTikTok وSnapchat جنب مبيعاتك في تقرير واحد، وبيعدّ البيعة مرة واحدة ويوزّعها على المنصات بدل ما كل منصة تاخدها لنفسها. بس ده كله شغال بشرط واحد: إن الـ UTM في إعلاناتك تبقى صح.

إيه أكبر مشكلتين عند المسوقين؟

المشكلة الأولى: مفيش مكان واحد بيجمع الداتا. صرف Meta في Ads Manager، وTikTok في حسابه، وSnapchat في حساب تالت. مفيش داشبورد واحدة تبص فيها على كل ده، فلازم تجمع الأرقام بإيدك في شيت.

المشكلة التانية: محدش عارف البيعة جت منين. ناس كتير بتلاقي أرقام المبيعات في المنصات الإعلانية مختلفة عن الأرقام في سلة أو زد أو Shopify أو الـ CMS اللي بيستخدموه. ولما تجمع اللي كل منصة بتقوله، المجموع بيطلع أكبر من اللي اتباع فعلًا.

والميزة هنا إن GA4 مش هيقولك البيعة جت منين بس. هو بيحل المشكلتين مع بعض.

إزاي GA4 بيجمع داتا كل المنصات في مكان واحد؟

GA4 بيتربط بـ Google Ads مباشرة. وفيه ميزة اسمها Campaign Data Import بتجيب باقي المنصات جنبه: Meta وTikTok وSnapchat وPinterest وReddit. (Google: استيراد بيانات الحملات)

من كل منصة بيدخل GA4 الصرف، والضغطات، ومرات الظهور (impressions)، يوم بيوم. فتشوف صرف كل منصة جنب الزيارات والمبيعات اللي جت منها، وتحسب تكلفة البيعة (CPA) والعائد على الصرف (ROAS) لكل المنصات بنفس الطريقة.

هنا حد هيسألني: طب GA4 هيدّي البيعة لمين؟

البيعة بتتحسب لمين؟

المنصات: كل واحدة بتحسب لنفسها

كل منصة إعلانية بتحسب البيعة على attribution window خاص بيها: فترة بعد الإعلان، لو العميل اشترى فيها، المنصة تعتبر البيعة بتاعتها. Meta مثلًا ممكن تحسب لنفسها أي بيعة حصلت خلال 7 أيام من الضغط على الإعلان، أو خلال يوم من مشاهدته من غير ضغط. (Meta: إعدادات الـ attribution)

خلّيني أقولك مثال. عميل دخل موقعك من إعلان على Meta، وبعدها بكام يوم، وجوه الـ 7 أيام، دخل من إعلان على TikTok واشترى.

تتوقع البيعة دي هتظهر فين؟

هتظهر في الاتنين. Meta هتقولك «أنا اللي جبتلك البيعة»، وTikTok هتقولك نفس الكلام. بيعة واحدة اتحسبت مرتين.

GA4: البيعة بتتقسم بالـ data-driven

في GA4 الوضع مختلف، لأنه بيستخدم موديل اسمه data-driven attribution: طريقة بتوزّع قيمة البيعة على كل المصادر اللي العميل عدّى عليها قبل ما يشتري، بدل ما تدّيها كلها لمصدر واحد.

وده من أقوى الموديلات في تحديد البيعة جت منين، لأسباب:

1. بيقسم الـ credit على أكتر من منصة. طبيعي تلاقي Meta واخدة نص بيعة، وTikTok واخدة ربع بيعة، والباقي لمصدر تالت.
2. بيتعلم من بياناتك إنت. بيقارن رحلة العملاء اللي اشتروا برحلة اللي ما اشتروش، ويشوف أنهي مصدر وجوده بيفرق فعلًا في الشراء. وبيبص على عدد الزيارات وترتيبها والوقت قبل الشراء. يعني مش إنت اللي بتحدد أنهي منصة أهم، الداتا هي اللي بتحدد. (Google: إزاي data-driven بيشتغل)
3. البيعة ما بتتعدّش مرتين. البيعة الواحدة في GA4 قيمتها واحد، متوزّعة على المصادر.

ليه رقم Meta في GA4 هيطلع أقل من Ads Manager؟

ده طبيعي، ولازم تكون متوقعه قبل ما تبدأ. فيه سببين:

1. GA4 ما بيشوفش المشاهدة من غير ضغطة. GA4 بيعرف بس الزيارات اللي حصلت على موقعك. لو العميل شاف إعلان Meta وما ضغطش عليه، مفيش زيارة حصلت، فـ GA4 مش هيعرف إن الإعلان ده كان في الرحلة أصلًا. وMeta بتحسب البيعة دي لنفسها.
2. فترة الحساب مختلفة. GA4 بيبص افتراضيًا على آخر 90 يوم قبل الشراء، وMeta على 7 أيام بالكتير بعد الضغطة. (Google: إعدادات الـ attribution)

خلّي بالك: قارن صح

ما تقارنش رقم Meta في GA4 برقمها في Ads Manager. قارن نصيب كل منصة من المبيعات جوه GA4، لأن كلهم هناك متحسبين بنفس الطريقة.

طب ليه الناس مش بتثق في GA4؟

المشكلة الكبيرة إن ناس كتير مش بتعرف تتعامل مع GA4، فبتلاقي زيارات Direct وUnassigned كتير جدًا. ولما جزء كبير من الترافيك يبقى «مش عارفين جه منين»، الشخص بيبعد عن GA4 ويرجع للمنصات.

الفرق بين الاتنين (قواعد القنوات عند Google):

• Direct: GA4 ما لقاش أي إشارة للمصدر خالص. لا UTM، ولا gclid، ولا موقع جاي منه.
• Unassigned: فيه مصدر، بس GA4 ما لقاش قاعدة قناة تنطبق عليه. مثلًا utm_medium=broadcast.

ومن خبرتي والمشاريع اللي اشتغلت عليها، أغلب الـ Direct والـ Unassigned الكتير سببه إن الـ UTM مش معمولة صح.

هتقولي يعني إيه UTM صح؟ هقولك إن GA4 ليه شروط، وحساس جدًا. حرف واحد لو بقى capital بدل small، الـ source هيظهر في التقرير صف لوحده. بس قبل الشروط، لازم نفهم GA4 بيقرا الزيارة إزاي.

GA4 بيعرف الزيارة جت منين إزاي؟

GA4 بيدوّر على المصدر بالترتيب ده، وأول ما يلاقي حاجة بيقف:

1. gclid الأول. ده الكود اللي Google Ads بتضيفه لوحدها على الرابط (auto-tagging). لو لقاه، بيسحب بيانات الحملة من Google Ads.
2. بعدها الـ UTM. لو مفيش gclid، بيقرا utm_source وutm_medium وutm_campaign. ولو الـ UTM موجودة بس مش مطابقة للشروط، GA4 بيسجّل الزيارة برضه، بس في القناة الغلط أو في Unassigned.
3. بعدها الموقع اللي جاي منه الزائر (referrer). لو مفيش UTM، بياخد الموقع اللي العميل كان عليه ويحطه كـ source، والـ medium يبقى referral.
4. لو مفيش أي حاجة من دول، الزيارة تبقى Direct.

جرّب بنفسك:

اختار رابط، وشوف GA4 هيقف عند أنهي خطوة وهيحط الزيارة في أنهي قناة.

1. اختار رابط من هنا

2. أو غيّر الـ source والـ medium بنفسك

utm_source utm_medium

1. gclid
2. UTM
3. referrer
4. Direct

النتيجة محسوبة بقواعد القنوات اللي Google نشرتها. اسم الحملة ثابت ومش داخل في الحسبة.

هنا لازم تاخد بالك من كام نقطة:

خلّي بالك: إعلانك ممكن يظهر مجاني

إعلان Meta من غير UTM الـ medium بتاعه هيبقى referral، والقناة غالبًا Organic Social، لأن فيسبوك في قايمة مواقع السوشيال عند Google. ولو المتصفح اللي جوه التطبيق ما بعتش الموقع اللي العميل جاي منه، الزيارة هتطلع Direct. في الحالتين فلوس إعلاناتك هتظهر كأنها ترافيك مجاني.

• ما تحكمش على آخر يومين. GA4 بياخد من 24 لـ 48 ساعة علشان يخلص معالجة البيانات، ومصدر الزيارة في الفترة دي ممكن يتغيّر. علشان كده الرقم بتاع امبارح مش نهائي.
• الـ Direct مش بياخد البيعة من غيره. لو عميل جالك من إعلان، وبعدين رجع لوحده واشترى، كل موديلات GA4 بتستبعد الـ Direct من البيعة، إلا لو كل الزيارات قبل الشراء كانت Direct.

كده عرفنا البيعة بتتحسب إزاي في GA4. وهنا السؤال المهم.

إيه شروط الـ UTM علشان GA4 يقراها صح؟

الشروط كلها موجودة في صفحة Google عن الـ UTM وقواعد القنوات. دي أهمها:

1. كل القيم small letters. facebook وFacebook في GA4 مصدرين مختلفين، والترافيك هيتقسم على صفين، وربط الصرف بالمبيعات هيفشل.
2. اسم واحد لكل منصة، ومتفق عليه في التيم. لو حد كتب facebook وحد كتب fb وحد كتب face، الترافيك مش هيتجمع تحت منصة واحدة.
3. utm_source وutm_medium وutm_campaign في كل رابط. أي واحد ناقص بيظهر (not set).
4. الـ medium لازم يطابق قاعدة من قواعد القنوات. المدفوع لازم يبدأ بـ paid أو يكون فيه cp (زي cpc)، وإلا GA4 هيحطه في قناة غلط. paid_social تروح Paid Social، لكن social_paid تروح Organic Social.
5. من غير مسافات ولا حروف عربي. المسافة بتتحول لـ %20، والعربي بيتحول لرموز زي %D8%B9 صعب تتقري وتتفلتر.
6. ما تحطش UTM على روابط جوه موقعك. اللينك الداخلي اللي فيه UTM بيبدأ مصدر جديد ويضيّع المصدر الحقيقي.
7. في Google Ads سيب الـ auto-tagging يشتغل وما تحطش UTM يدوي.

وتقدر تكتب أي utm_source وutm_medium وتشوف GA4 هيحطهم في أنهي قناة، في الأداة اللي في آخر المقالة.

كده خلّينا GA4 يقرا الداتا صح.

إزاي GA4 يربط الصرف بالمبيعات؟

السؤال اللي بعده: إزاي GA4 يربط المبيعات بالمنصات الإعلانية، ويقولك كل حملة صرفت كام، وظهرت كام مرة، وجابت كام بيعة؟

الربط بيتم بالـ UTM برضه. Campaign Data Import بياخد أرقام المنصة، ويدوّر في GA4 على الزيارات اللي ليها نفس utm_source وutm_medium بالحرف في نفس اليوم، ويربطهم ببعض. دول الشرطين الإجباريين. وجنبهم تلات حاجات:

1. utm_id بنفس رقم الحملة في المنصة، ومعاه utm_campaign باسمها. Google كاتبة عليهم «optional, but highly recommended». من غيرهم، الصرف هيتربط على مستوى المنصة كلها، مش كل حملة لوحدها. في Meta اكتب utm_id={{campaign.id}} والمنصة بتملاه لوحدها.
2. اسم الـ ad set والإعلان في الـ UTM. ده مش شرط للربط، لأن الصرف بيتربط على مستوى الحملة بس. لكن يُستحسن تحطهم في utm_term وutm_content، علشان تشوف مبيعات كل إعلان في GA4.
3. GA4 مربوط بالمنصة الإعلانية. وفي الإعداد تكتب utm_source وutm_medium بنفس القيمة اللي في إعلاناتك بالحرف، pair واحد لكل منصة، مثلًا facebook / paid_social على طول. ومحتاج صلاحية Editor في GA4، وصلاحية مشاهدة الأداء في حساب الإعلانات.

غلطة بتتكرر كتير

إعلان Meta بيظهر على فيسبوك وإنستجرام وMessenger. لازم نفس الـ UTM على كل الأماكن، وإلا جزء من الزيارات مش هيتربط بالصرف.

ولو عايزني أكتب عن خطوات ربط كل منصة إعلانية بـ GA4 بالتفصيل، قولي وأنا أكتب عن الموضوع ده.

الربط ده بيظهر فين؟

في مكانين:

• Reports › Acquisition › Non-Google campaign: الصرف والضغطات ومرات الظهور جنب الجلسات والمبيعات. تقدر تغيّر البعد لـ Session source/medium أو تضيف Session campaign ID.
• Advertising › Planning › All channels: كل منصاتك، Google وغيرها، جنب بعض.

(Google: استيراد بيانات الحملات)

حدود لازم تعرفها قبل ما تبدأ

• الاستيراد بيدخّل التكلفة والضغطات ومرات الظهور بس. مفيش reach، ولا مشاهدات فيديو، ولا المبيعات اللي المنصة حسبتها لنفسها. المبيعات بتيجي من GA4.
• صرف كل إعلان لوحده مش هيظهر في GA4. الصرف بيقف عند الحملة.
• البيانات بتاخد لحد 24 ساعة علشان تظهر.
• لازم تحدد عملة الصرف في الإعداد، وGA4 بيحوّلها لعملته لوحده.

إزاي تتأكد إن الربط شغال؟

من Admin › Data import افتح الإعداد وبص على رقمين:

• % imported لازم يبقى 100%.
• Match rate: نسبة الصفوف اللي اتربطت بزيارات في GA4. لو قليل، يبقى الـ UTM مش متطابقة.

أهم علامة

لو لقيت حملة ليها صرف وصفر sessions، يبقى الـ UTM في المنصة غير اللي كتبتها في GA4.

إيه اللي ممكن يبوّظ الأرقام حتى لو الـ UTM صح؟

حاجتين بشوفهم كتير في المتاجر:

1. بوابات الدفع. لو العميل بيدفع على موقع بوابة الدفع أو التقسيط، زي Tabby أو Tamara، وبعدين بيرجع لموقعك، GA4 ممكن يعتبر البوابة هي المصدر وياخد البيعة من الإعلان. الحل إنك تضيف دومين البوابة في List unwanted referrals من إعدادات الـ data stream. (Google: الـ referrals اللي مش عايزها)
2. حدث الشراء نفسه. الـ attribution كله مبني على event الـ purchase. لو مش بيتبعت، أو مفيهوش transaction_id وvalue وcurrency، كل اللي فوق مش هيفرق. (Google: أحداث التجارة الإلكترونية)

وخلّي بالك: GA4 مش هيطابق سلة أو زد 100%. المرتجعات مش بتتشال منه لوحدها إلا لو موقعك بيبعت event اسمه refund، وفيه زوار بيمنعوا التراكينج. الهدف إن الفرق يبقى صغير ومفهوم، مش صفر.

إزاي تعمل UTM صح من غير ما تحفظ الشروط دي؟

الشروط موجودة كلها في مقالة Google عن الـ UTM اللي فوق. بس الموضوع دلوقتي هتحس إنه مش سهل، فعملتلك أداة بتعمل UTM صح بالشروط اللي قولتلك عليها.

افتح أداة الـ UTM Builder ← مجانية، وكل حاجة فيها بتحصل في متصفحك.

الفرق بينها وبين أي UTM builder تاني:

1. الخانات مش مفتوحة لأي حاجة. أغلب الـ builders بتسيبك تكتب أي حاجة في أي خانة، وده مشكلة كبيرة لأن ناس كتير مش بتتبع شروط GA4. الأداة دي بتحوّل الحروف لـ small لوحدها، وبتشيل المسافات، وبتنبّهك لو كتبت حاجة GA4 مش هيفهمها.
2. بتوحّد الأسماء في التيم. في أغلب التيمز، ناس بتكتب facebook وناس face وناس Face، فالترافيك كله مش بيبقى تحت منصة واحدة مع إنه جاي من منصة واحدة. الأداة بتخلي الكل يختار من نفس الأسماء.
3. متوافقة مع ربط الصرف. فيها اختيارات جاهزة لـ Meta وTikTok وSnapchat فيها utm_id والقيم اللي المنصة بتملاها لوحدها، فالبيانات تتسحب من المنصات الإعلانية وتظهر في GA4 صح.

استخدمها، وادعيلي، وقولي رأيك.

لو عايز تقرا أكتر عن الـ tracking والتحليل، هتلاقي باقي المقالات في المدونة.