المقالات

إزاي تربط إعلانات Meta بـ ChatGPT وClaude

إسلام أبو شعيشع · آخر تحديث

تقدر تربط حساب إعلاناتك على Meta بـ ChatGPT أو Claude في دقايق ومن غير كود، برابط واحد من Meta: https://mcp.facebook.com/ads. وبعدها تسأل عن حملاتك بالكلام العادي.

تحت هتلاقي ربط لكل أداة خطوة بخطوة.

إيه هو الـ MCP server بتاع Meta؟

الـ MCP (Model Context Protocol): طريقة موحّدة بتخلّي أداة AI زي ChatGPT أو Claude تتكلم مع برنامج تاني، فتاخد منه داتا أو تنفّذ فيه حاجة.

وMeta عملت MCP server رسمي لحسابات الإعلانات، وده مكتوب في صفحة Meta للمطورين.

الربط ده بيخلّي الـ AI قادر إنه:

  1. يعمل تقارير عن أداء حملاتك ويحللها معاك.
  2. ينشئ ويعدّل حملات وad sets وإعلانات.
  3. ينشئ ويعدّل الـ custom audiences والـ catalogs.
  4. يقرالك جودة الـ signals اللي بتوصل لـ Meta، زي Event Match Quality.
  5. يعمل A/B tests، ويقرالك سجل التغييرات في الحساب.

محتاج إيه قبل ما تبدأ؟

  • حساب فيسبوك عنده صلاحية على حساب الإعلانات.
  • ChatGPT بخطة مدفوعة، من المتصفح مش من الموبايل (صفحة OpenAI).
  • Claude بأي خطة، حتى الـ Free بس فيها connector واحد (صفحة Anthropic).

والرابط واحد في الأداتين:

https://mcp.facebook.com/ads
صفحة Meta للمطورين تحت عنوان Connect to ads MCP server وعليها دايرة حوالين الرابط https://mcp.facebook.com/ads
الرابط الرسمي في صفحة Meta للمطورين.

إزاي تربط Meta بـ ChatGPT؟

  1. افتح ChatGPT من المتصفح، وادخل على Plugins، واضغط علامة + اللي جنب خانة البحث. ولو ظهرتلك قايمة، اختار Add custom MCP server.
صفحة Plugins في ChatGPT وعليها دايرة حوالين علامة + اللي جنب خانة Search plugins
  1. املا شاشة New Plugin كده:
    • Name: أي اسم، مثلًا Meta MCP.
    • Server URL: الرابط https://mcp.facebook.com/ads.
    • Authentication: سيبها OAuth.
    • علّم على I understand and want to continue، واضغط Create.
شاشة New Plugin في ChatGPT وعليها 4 أرقام: 1 خانة Name مكتوب فيها Meta MCP، و2 خانة الرابط https://mcp.facebook.com/ads، و3 علامة على I understand and want to continue، و4 زرار Create
1 الاسم، 2 الرابط، 3 الموافقة على التحذير، 4 Create.
  1. اضغط Sign in with Meta MCP.
نافذة Add Meta MCP to ChatGPT وعليها دايرة حوالين زرار Sign in with Meta MCP
  1. في صفحة فيسبوك اضغط Continue، وكمّل لحد ما ترجع لـ ChatGPT.
صفحة فيسبوك مكتوب فيها Reconnect ChatGPT to ads MCP server وعليها دايرة حوالين زرار Continue
عندي Reconnect لأني كنت رابطه قبل كده. أول مرة هتلاقي Connect.
  1. لو لقيت حسابك تحت Connected accounts، يبقى الربط تم.
إعدادات الـ plugin في ChatGPT وعليها رقمين: 1 حول Connected accounts وتحتها الحساب المتوصل، و2 حول Allow low-risk actions تحت Permissions
1 حسابك المتوصل. 2 الإعداد الافتراضي: ChatGPT بيطلب موافقتك قبل أي تغيير مهم.

علشان تستخدمه: في شات جديد اكتب @ واختار الـ plugin.

مش لاقي علامة +؟

شغّل Developer mode: افتح Settings ثم Security and login، وشغّله، وارجع للخطوة 1.

إعدادات ChatGPT وعليها رقمين: 1 حول Security and login في القايمة، و2 حول زرار تشغيل Developer mode

ليه ChatGPT على الويب ومش Codex؟

لأن الربط من ChatGPT على الويب أسهل بكتير. علشان كده أنا دايمًا بربط من هناك.

إزاي تربط Meta بـ Claude؟

الخطوات واحدة في claude.ai وClaude Desktop.

  1. ادخل Settings ثم Connectors، واضغط Add ثم Add custom connector.
صفحة Connectors في إعدادات Claude وعليها رقمين: 1 حول Connectors في القايمة، و2 حول زرار Add وتحته Add custom connector
  1. اكتب اسم، مثلًا Meta mcp، وحط الرابط https://mcp.facebook.com/ads، واضغط Continue.
نافذة Add custom connector في Claude وعليها 3 أرقام: 1 الاسم Meta mcp، و2 الرابط https://mcp.facebook.com/ads، و3 زرار Continue
  1. Claude بيكتشف الإعدادات لوحده، وهتلاقي جنبها كلمة Detected. سيبها زي ما هي، وانزل تحت واضغط Add.
إعدادات الدخول في Add custom connector وعليها رقمين: 1 حول Sign in now ومعاها Detected، و2 حول Register automatically ومعاها Detected
  1. اضغط Connect.
شاشة في Claude مكتوب فيها You’re not connected to Meta mcp yet وعليها دايرة حوالين زرار Connect
  1. في Claude Desktop، هيفتح المتصفح على صفحة Finish connecting a connector?. اضغط Continue connecting.
صفحة Finish connecting a connector في المتصفح وعليها دايرة حوالين زرار Continue connecting
  1. في صفحة فيسبوك اضغط Continue، وكمّل لحد ما ترجع لـ Claude.
صفحة فيسبوك مكتوب فيها Connect Claude to ads MCP server وعليها دايرة حوالين زرار Continue

علشان تستخدمه: في الشات اضغط + ثم Connectors، وشغّل Meta mcp.

أول سؤال تجربه بعد الربط إيه؟

ابدأ بسؤال بيقرا بس، علشان تتأكد إن الحساب الصح هو اللي متوصل. دول السؤالين اللي Meta مقترحاهم كبداية:

اعرضلي حسابات الإعلانات اللي عندي:

List my ad accounts.

لخّصلي أكتر الحملات صرفًا في الحساب ده آخر 30 يوم:

Summarize the top-spending campaigns in <AD_ACCOUNT_ID> over the last 30 days.

حط رقم الحساب مكان <AD_ACCOUNT_ID>، وتقدر تكتبهم بالعربي عادي.

إسلام بيدوّر بعدسة مكبّرة

خلّي بالك: دي أرقام Meta

الـ AI بيقرالك الأرقام زي ما Meta حاسباها، بالـ attribution بتاعها. يعني المبيعات اللي هيقولك عليها ممكن تطلع أكبر من اللي اتباع فعلًا، لأن كل منصة بتحسب البيعة لنفسها.

هل الـ AI هيقدر يغيّر في إعلاناتي؟

أيوه، لو إنت عندك الصلاحية دي. فيسبوك بيقولها صريحة: الأداة بتاخد نفس صلاحياتك، وإنت المسؤول عن أي صرف أو تغيير تعمله. بس فيه 3 حاجات بتحميك:

  1. أي action محتاج موافقتك من جوه الأداة.
  2. أي إعلان جديد بيتعمل paused لحد ما إنت تشغّله.
  3. تقدر تقفل actions معينة من Meta. من Settings في Meta Business Suite، تحت Integrations اختار Ads MCP server، واقفل اللي مش عايزه، زي Create campaigns أو Edit or set budget، أو حط حد أقصى للميزانية. ده محتاج full control على الـ business portfolio.
إسلام قلقان

خلّي بالك: لو أكتر من حد شغال على الحساب

القواعد دي بتتطبق على أي حد بيوصل للحساب عن طريق أداة AI. لو فيه تيم أو وكالة شغالين معاك، حط حد أقصى للميزانية قبل ما حد يربط.

هل حساب الإعلانات ممكن يتقفل بسبب الربط ده؟

Meta بتقول إن الربط عن طريق الـ MCP server بتاعها آمن، ومن المستبعد إن حساب يتقفل بسببه. الحسابات بتتقفل لما الإعلانات تخالف سياسات Meta، مش علشان الحساب متوصل بأداة AI.

أربط ChatGPT ولا Claude؟

الاتنين بيوصلوا لنفس الأدوات، فاختار الأداة اللي مرتاح تشتغل بيها. أنا بستخدم الاتنين كل يوم.

ChatGPT Claude
بتضيف الرابط منين Plugins ثم علامة + Settings ثم Connectors
الخطط خطة مدفوعة كل الخطط، والـ Free فيها connector واحد
بتشغّله في الشات إزاي اكتب @ واختار الـ plugin علامة + ثم Connectors

ابدأ بـ List my ad accounts واتأكد إن الحساب الصح هو اللي ظاهر. وفي مقالة لوحدها هوريك إزاي تستخدم الربط ده تعمل audit للتراكينج بتاعك على Meta.

اقرا كمان: